ЦССҮТ бодлого, зорилтоо хангах чиглэлээр төрийн болон төрийн бус байгууллагууд, аж ахуйн нэгж, иргэдийн оролцоог чухалчилж үздэг. Энэ хүрээнд Монголын донорын холбоо (МДХ) 2017 онд ЦССҮТ-тэй албан ёсоор хамтын ажиллагааны гэрээ байгуулж ажилласан юм. Тус холбооны гишүүн нийт 30 ахмад донор сайн дураараа ЦССҮТ-ийн нэг, хоёрдугаар байранд угтах, үдэх үйлчилгээнд өдөр бүр туслахаас гадна донорын сургалт сурталчилгаа, явуулын цус цуглуулах үйл ажиллагаанд ч идэвхтэй хамрагддаг. Мөн донорын нийгмийн асуудлыг шийдвэрлэх чиглэлд ЦССҮТ-тэй хамтарч ажилладаг. Өнөөдөр буюу 2018 оны 3-р сарын 16-нд МДХ-ны удирдлагууд , ахмад донорууд ЦССҮТ-д хүрэлцэн  ирж гэрээний дагуу хийж хэрэгжүүлсэн ажлаа дүгнэлээ.\r\n\r\nМДХ-ны гүйцэтгэх захирал Б.Мандах гэрээний биелэлтийн тайлан тавьж холбооныхоо гишүүн ахмад доноруудынхаа асуултад хариулсан юм. ЦССҮТ-ийн захирал Н.Эрдэнэбаяр хэлсэн үгэндээ “Монгол Улсын цусны албаны хөгжилд МДХ, ахмад доноруудын гүйцэтгэж байгаа үүрэг их. Олон улсын жишгээр манай ахмад донорууд ЦССҮТ-ийн зорилго, үйл ажиллагааг идэвхтэй дэмжиж ажилладагт баярлаж явдаг” хэмээн онцоллоо. Тэрбээр мөн 2017 онд ЦССҮТ-өөс хийж хэрэгжүүлсэн гол ажлуудаасаа дурдаж, харилцан ярилцлаа. Тайлангийн үеэр талууд хамтын ажиллагааныхаа үр дүнд сэтгэл өндөр байгаагаа харилцан илэрхийлж хамтран ажиллах  гэрээгээ сунгахаар болов.\r\n\r\n\r\n\r\n\r\n\r\n