Японы нэр хүндтэй “Yomiuri Shimbun” сонины сэтгүүлч Шинго Сугиме АХБ-аас Азийн улс орнуудад хэрэгжүүлж буй нийт төслүүдийн талаар тусгай сурвалжлага бэлтгэхээр ажиллаж байгаа аж. Улмаар АХБ-ны нэрлэсний дагуу Монгол Улсад хүрэлцэн ирж, АХБ-аас хэрэгжүүлж буй “Эрүүл мэндийн салбарын хөгжил, хөтөлбөр 5” /ЭМСХХ-5/  төсөлтэй танилцах ажлынхаа хүрээнд ЦССҮТ-д зочилж үйл ажиллагаатай нь танилцлаа.

Ноён Шинго Сугимег ЦССҮТ-ийн захирал Н.Эрдэнэбаяр тэргүүтэй төвийн удирдлага, эмч мэргэжилтнүүдийн төлөөлөл хүлээн авч уулзлаа. Мөн АХБ-аас хэрэгжүүлсэн төслүүдийн хүрээнд нэвтрүүлсэн техник, технологиудыг танилцуулж, Цус, цусан бүтээгдэхүүний үйлдвэрлэл, хадгалалт, тээвэрлэлт, чанар, аюулгүй байдалд гарсан дэвшлийн талаар дэлгэрэнгүй дурдав. Уулзалтад ЭМССХ-5 төслийн менежер Р.Эрдэнэтунгалаг, АХБ-ны Монгол дахь суурин төлөөлөгчийн газрын гадаад харилцааны мэргэжилтэн Г.Гантуяа нар оролцлоо.

“Yomiuri Shimbun” сонин нь уншигчийнхаа тоогоор Гиннесийн номонд бүртгэгдсэн Японд төдийгүй дэлхийд нэр хүнд бүхий сонин юм.