Жил бүрийн 12 дугаар сарын 5 бол Сайн дурынхны Олон улсын өдөр. Өөрөөр хэлбэл, бусдын амь нас, эрүүл мэндийг аврахын төлөө ариун цусаа сайн дураараа бэлэглэдэг хүмүүнлэгийн үйлстнүүдийг алдаршуулах өдөр юм. Энэ өдөр олон хүн сайн дурынхны буянт эгнээнд нэгдэж цусаа бэлэглэдэг билээ.\r\nСайн дурынхны Олон улсын өдрийн хүрээнд ЦССҮТ, Монголын донорын холбоо, Сайн дурын байгууллагууд хамтран уламжлалт “Сар бүрийн 3-Цусаа бэлэглэх өдөр”-ийг өнөөдөр зохион байгууллаа. ЦССҮТ-ийн захирал Н.Эрдэнэбаяр үйл ажиллагааг нээж хэлсэн үгэндээ “Цусны донорын эгнээг өргөжүүлэхэд МДХ идэвх санаачилга гаргаж, ЦССҮТ-тэй хамтран ажиллаж ирснийг энд зориуд тэмдэглэхийг хүсч талархал илэрхийлье. Өнөөдрийн арга хэмжээг дэмжиж ажилласан “Добуда” ХХК-ийн нийт хамт олонд маш их баярлалаа” гэлээ.\r\nСар бүрийн 3-ны үйл ажиллагааг олон байгууллага, иргэн дэмжиж, хамтран ажиллахаа илэрхийлдэг бөгөөд энэ удаад “ДОБУДА” ХХК дэмжиж ажилласан юм. Тус компани энэхүү өдрийн хүрээнд цусаа бэлэглэсэн доноруудад бүтээгдэхүүнийхээ дээж энергийн ундаа бэлэглэв.\r\nУламжлал ёсоор донор Г.Хишигжаргал, Ч.Гантулга, Н.Намжилмаа нарт “Хүрэл донор” цол хүртээж алдаршуулсан юм. Мөн “Бахархал-20” тэмдгээр донор Л.Энхтүшиг, “Бахархал-30” тэмдгээр донор Э.Дашгарав, “Бахархал-40” тэмдгээр донор Э.Чимэдцэрэн, “Бахархал-50” тэмдгээр донор Б.Бямбажав нарыг тус тус шагнаж, хүндэтгэл үзүүлэв.