Дэлхий даяар шинэ коронавируст халдвар (Ковид-19) цартахлын улмаас үүссэн нөхцөл байдалтай холбоотойгоор энэ жилийн “Цусны донорын дэлхийн өдөр”-ийг “Эрүүл дэлхийн төлөө цусаа бэлэглэцгээе” уриан дор цахим хэлбэрээр тэмдэглэн өнгөрүүлж байна. Цахим арга хэмжээг нээж Цус сэлбэлт судлалын үндэсний төвийн дарга ноён Н.Эрдэнэбаяр үг хэлсэн бол, Монголын Улаан загалмайн нийгэмлэгийн Ерөнхий нарийн бичгийн дарга Н.Болормаа ирж мэндчилгээ дэвшүүлж, Монгол Улсын Эрүүл мэндийн сайд Д.Сарангэрэл , ДЭМБ-ын суурин төлөөлөгч Сергей Диордица нар цахимаар баярын мэнд хүргэлээ.
2004 оноос жил бүрийн энэ өдрийг бусдад амьдрал бэлэглэгч цусны доноруудын ариун үйлсийг сурталчлах, тэдэнд талархал илэрхийлэх, олон нийтэд алдаршуулах, урьд өмнө цусаа өгч байгаагүй залуусыг цусны донорын үйлсэд татан оролцуулах, байнгын доноруудыг идэвхжүүлэх зорилгоор “Цусны донорын дэлхийн өдөр” болгон тэмдэглэж ирсэн билээ. Уг арга хэмжээг Цус сэлбэлт судлалын Үндэсний төвтэй JCI capital байгууллага хамтран зохион байгуулж , Төр.мн сайт шууд дамжууллаа.
Цус сэлбэлт судлалын Үндэсний төв нь Монгол Улсын хэмжээнд цус, цусан бүтээгдэхүүний нөөц, аюулгүй байдлыг ханган ажилладаг бөгөөд олон улсын 3 стандартыг хэрэгжүүлсэн Эрүүл мэндийн байгууллага юм.
Энэ жилийн хувьд манай улсын хэмжээнд цус, цусан бүтээгдэхүүний хэрэгцээ өмнөх жилүүдээс 8 хувиар өссөн боловч, дэлхий нийтээр цартахал дэгдсэнтэй холбоотойгор явуулын цус цуглуулалт буурсан үзүүлэлттэй байна. Нийгмийн эрүүл мэндийн ноцтой байдал тулгарсан энэ үед төрийн болон төрийн бус байгууллага аж ахуйн нэгжүүд нийгмийн хариуцлагынхаа хүрээнд , хүмүүнлэгийн үйлсэд нэгдэн бидний ажилд ихээхэн дэмжлэг болж байгаад талархалтай байна.
Энэ жил нийт 35 удаа цусаа бэлэглэсэн Хүндэт донор Улсын хэмжээнд нийт 96 байна. Үүнээс Улаанбаатар хотод 43 иргэн Хүндэт донорын болзол хангалаа. “Мөнгөн донор”-оор 100 удаа цусаа бэлэглэсэн С.Отгонбаяр, “Хүрэл донор”-оор 70 удаа цусаа бэлэглэсэн П.Өлзийхишиг, “Хамгийн залуу Хүндэт донор”-оор 21 настай Б.Пүрэвнамжил, “Хамгийн олон өгөлттэй донор”-оор жилийн хугацаанд 15 удаа цус,цусны бүрэлдэхүүн хэсгийг бэлэглэсэн Хүндэт донор Н.Мөнхнасан тус тус шалгарлаа. Түүнчлэн хамтран ажиллагч байгууллагуудаас тухайн жилийн шилдгүүдийг “Донор хамт олон”, “Донор элсүүлэгч” хамт олноор шалгаруулдаг уламжлалтай билээ.
“Хамгийн олон донор элсүүлэгч” хамт олноор:
Нэгдүгээр байранд Баянзүрх дүүргийн Улаан загалмайн хороо , Хоёрдугаар байранд Сонгинохайрхан дүүргийн Улаан загалмайн хороо, Гуравдугаар байранд Монголын донорын холбоо шалгарлаа. Мөн “Донор хамт олон”оор Зэвсэгт хүчний 032-р анги, Баянзүрх дүүргийн Иргэдийн төлөөлөгчдийн хурлын ажилтан , албан хаагчид тодорлоо.
Монгол Улсынхаа цус цусан бүтээгдэхүүний нөөц, аюулгүй байдлыг хангаж ажилладаг цусны салбарын нийт эрүүл мэндийн мэргэжилтэн, ажилтан, үе үеийн нийт ачтан донорууд, улаан загалмайчид, байнга дэмжиж хамтран ажилладаг бүхий л байгууллага, иргэддээ “Цусны донорын дэлхийн өдөр”-ийн мэндийг ЦССҮТ-ийн хамт олны нэрийн өмнөөс өргөн дэвшүүлж, эрүүл энх, сайн сайхныг бүхнийг хүсье.